fenix (phoenix)

(maralumdum ya ing banua / kabang oras pamung pa’gtuan,
mangakapal la ring biga / anting limputan king lulam,
detang anggang mekasaksi / anti la mo waring misdan
king pamagpaldas ning banuang / kan’ta ra pa’ aranasan,
bageng e bitasang linub / king pamisip ning ninu man,
iti, ing makipasari / itang pinatubung bolkan.)

ding mangabayat a biga / megumpisang minye lintik,
itang danum meging burak / uli ning abung minyulpit,
uran balas salat batung / kasindagul panimalid
inia ing kanglap migbusal / pusu ding tau’t pamisip.
dakal ding mipatingangas / king e asahan pinandit
iniang linukub ing lulam / pisak a bengi nung akit.at

karing al’wa nang dake / niting sintang kapampangan
e mu sukat a isipan / delanan dang kasakitan,
masangil yang anting lasip / din’tang karela ing lahar,
anting manakong menangkin / karing karelang pibandian,
karing asikan da’t bale / dakal lang mengatambunan,
pelalung kapanamdaman / kayabe king mengasintang.

ding bale dang pimamanan / at ding king pawas atangka
misan na la’ pemanutas / nitang kalmang menganiaya,
karing negosyung misara, / karing puunang miragsa,
dakal lang menagulele / lalu karing bieng mewala;
king trahedya a milyari / mengalimgiman ding sabla
anting simientung mibulus, / pelitadan matning gaga.

anti mu nang darandaman / ing paniatang nitang lahar,
anti mong dindam ding dakal / a karitelang daratang,
ing inge at kalabug da / at sintak da ring parulang,
ing pulayi babie galgal / king gabun a daralpakan
uli ning misamut-samut, / balas, batung ibat bolkan
kambe ning lanyo’t dayuput / nitang danum a durugang.

king makuyad a panaun / meparalisa ing sabla
uling karing tete’t dalan / dakal la ding mengasira
uling meging mabangis ya / ing dating malagung sapa,
ing kayang p’wersang pepakit / tutung makakamakama…
at itang kaligaligan / silsulan ning lilung kalma
king ayun masika’t maina / a pegalgal karing malda.

dapot deting kapampangan / gereru lang mangatapang,
lalung lulkas ing tepangan / kabang mangasugatanan,
karing ninu’t nanung datang / arapan de’t e gulutan,
e la tatakut king leun / at tigri nganing kasebian;
nung ing sukad na, sukad bie, / ing hamun e re urungan
pablasang karing uyat da / mamagus ing dayang lakan.

katangiang kapampangan / ing armas nang pagmaragul,
at karing anak ning indu / likas ing pamisanmetung
at ding sabla kinimut la / para ketang pamibangun,
ding sasakupang memalen / angga karetang pekapun,
dapot ing peka-kalasag / king problemang susun-susun
ya pin itang tiwala ra / king Guinung tamung Meniaklung.

inia keti kapampangan / andyang ninu ding maniatang,
p’wersa man ibat king labuad / ding dayu a mapangamkam
o itang naturalesang / masakit diling kalaban,
ing matibe diling armas / -lubus a kapanaligan,
ing tiwalang gagalmanan / king Mayupayang Miglalang,
e Na ibie ing pagsubuk / migit kesa king kagiwan.

memanalakad lang dike, / panaguantang agus danum
ban kanita ing pinsala / ayiwasan ing panyagul
dapot mengasira la rin / king lahar a dinalusung
pamatbat nong alang bayat / king dabiral a panaun,
dapot e ya sangkan ita / ban patugut ding pekapun
mitalakad pasibayu / pamatabat ketang dabun.
________________________________
**ngeni, alben me ing indu, / lalaki yang masalpitik
ing bage nitang milabas / king lupa na e mu akit,
uyab ning kapagsubukan / a misan keya dinantik
at sukal lub a pesari / nitang bolkang minie pait;
karing aldong mirate ya, / menagulele king sakit,
ngeni mayumu ing timan / a penalili king ngisngis;

menibat king pangaragsa / mekapibangun ing sabla,
ibat king bigang limputan / siniro la detang yata
king mitapus a dalumdum, / ing migbabo itang sala
anting sulung selaingan Na / ning Dios tamung Mayupaya,
ing leguan na at sikanan / pasibayung miniagiwa
king abu nang kesagkulan, / anting Fenix yang miyapsa.
-30-