Saturday, September 25, 2010

ban e re tikusan

ketang misan pamitagun kayabe ko ring poeta,
dindam ku lang migagale karing letra ring poesia,
detang amanung iyapse istung dikdik ing aduan da
masikan ya pa king dugdug ing siwala ring makata.

pablasang mababo ku mu, king dindam ku karela,
misdan ku king kalalam da ring ginaleng kawatasan
(lalung migit) king kabiasnan karing linya ing anamnam,
mengari king ibat mengan, ing lasa balik-balikan.

mipatingangas king leguan, lalam at katas ding bersu
mesawang kung anting sibung king saplala ring amanu,
malalam la’t matas beluan ding makudtang karungut ku,
nung danum mu sana ita siguradung limbug naku.

anti ku mo waring papil a masanting pangaladlad,
anting baru a plantsadu a matikas nung talakad,
meglamukut king dindam da ring balugbug kung malapad,
anti ku rugung lemutak at king pawas ku mibabad.

mayap namu e la maimut ding watas kung akayabe,
kaku a suling sisirut e mababa paglalawe
nun’e pin makasadya la a kanakau manantabe,
king karelang bunsung wali anting kapatad pangane.

at ngeni ing kakung nasa talastas ku king poesia
e king sangkan a mabiasa o mitas kesa karela
nun’e pin ban mitais ku e mu king amanu’t rima
nun’e pati king ugaling dapat king metung poeta.

pablasang karing poeta makasinup ing amanu
uling ding karelang pusu anti lang lulanang gintu
at ding sepu ning pluma ra ing asbuk ning pusu atiu
at ing tintang mibububu anting daya karing bersu.

dakal karing mangagaling a soldadu ning poesia
ding atiu na king sisilim karing lekaran dang banua
ding mabayat munie usuk karing malda, at gigiya,
ditak na la’ng mitatagan uling dakal na minuna.

karing dahing e ra dasnan ding makudtang mitatagan
itulut dang balaus mi ing misyun dang matenakan,
makanian ku pung magsalbat a makikapangangasan
uling ing pigaganakan pota ala nang malakwan.

lalu ngening dakal anak ding memanabang na dila
king amanu tamung sisuan anting misnuk magsalita,
anti waring liling dikut a puputputan dang serya
uyab ning pamagsalita a alang ingat bitasa.

at potang mabiasa naku nanu naman itang gawan?
mumunang dili, e dapat itas ing kakung luklukan,
pakatatak ku king pusu ugaling kapagkumbaban,
buntuk ning mituru kaku ban maging kung anting uban.

at kanita karing anak, ing mituru naman, aku,
idalakit ing leguan na ning sisuang amanu tamu
uling e ku buring datang ing panaun kekatamu
a sumlam ya karing dila’t malaus tumabang yumu;

paganaka ing ulaga ban karelang atandanan
at mitimu yang malalam king pusu ra’t e kalinguan
ban luguran de’t ingatan, itanam de at gambulan,
kapilanman e tikusan ing amanu tamung sisuan.
-30-

No comments: